Chegou o Nadal ao centro

Está preto o Nadal e nótase no centro, que se engalana para a ocasión. Aquí vos deixamos as fotos da decoración, xunto coas actividades realizadas estes días:

• Decoración da entrada do centro e da biblioteca.

• Decoración de portas e aulas en Educación Infantil e Educación Primaria e realización de postais, de parte do alumnado de Educación Primaria, para o Centro de Día do pobo.

• Actividade "Lévasnos ao teu fogar?" destinada ao persoal docente e non docente do centro.

Despedindo o trimestre cos colaboradores

Esta semana despedimos o trimestre cos colaboradores da biblioteca dun xeito especial, para agradecerlles a súa dedicación. Porque, entre tanto mural e decoración, é necesario repoñer forzas. Esperamos que o pasásedes ben! Seguimos traballando á volta. Boas vacacións!

RECOMENDACIÓNS LECTORAS PARA TEMPOS FRÍOS

               

Como cada ano, aquí vos deixamos unhas suxestións para este tempo de frío e de lecer. 

Estes meses, ademais, chegaron moitas novidades á nosa biblioteca, que no mes de xaneiro estarán preparadas para o préstamo. Botádelles un vistazo por se vos interesa algunha. Poden ser, tamén, unha boa opción para agasallar ou agasallarvos, nestas datas. 

Boas festas!!

Recomendacións dos Departamentos de Inglés e de Lingua Castelá

Axiña desfrutaremos de días de lecer, así que aproveitamos este mes para facervos diferentes recomendacións, pensando xa neses días de inverno con poucas horas de luz e moito frío, tan propicios para mergullarse nun libro ou nunha película.

Comezamos co traballo feito polo Departamento de Inglés, no que o alumnado estivo a escribir recomendacións de libros e películas.

Coñécelos?

Dende o Departamento de Lingua Castelá, o alumnado de 3º ESO estivo a investigar cales foron os libros máis vendidos nos últimos anos. Buscaron obras de diferentes xéneros e subxéneros (poesía, teatro, cómic, biografías, narrativa xuvenil, romántica, de terror...).

Bótalles un ollo. Gustaríache que mercásemos algún para a biblioteca?

25N, preocúpanos a túa vida

 

Para a conmemoración desta data levamos a cabo as seguintes actividades:

• Recomendacións lectoras: 

• Pancarta, na entrada do centro, feita polo alumnado de Educación Primaria e Educación Infantil:

• Mural, situado na entrada do centro, feito polas colaboradoras da biblioteca e o alumnado de 2ºESO. 

• Tanto EI, como EP acudiron ao espectáculo de Rilo & Penadique, na casa da cultura do concello de Boimorto.

• Os Departamentos de Lingua Galega e Lingua Castelá fixeron unha actividade na que se reflexiona sobre o papel da muller nalgúns contos tradicionais. 

“As do mare” desembarcan en Boimorto

 

Rilo & Penadique trouxeron este espectáculo con motivo da conmemoración do Día Internacional da Eliminación da Violencia contra a Muller o vindeiro 25N.

Toda a etapa de Educación Primaria acudiu o mércores 23 de novembro ás 12h á Casa do Concello, onde acougaban a contacontos Vero Rilo e a acordeonista Sonsoles Penadique.

Dun xeito ameno e divertido achegáronnos estes contos protagonizados por mulleres do mar. Dende relatos mitolóxicos coma o da Serea Maruxaina coas tres probas que propón ao seu namorado; a fatídica historia da pena do cú da raíña, que leva o nome pola angustiosa viaxe da Raíña Mariana a terras de Castela; ou o das tres conserveiras: a “Moucheira”, a “Novena” e “Fía na Porta” e a creatividade que despregaron á hora de escapar do cárcere e do carcereiro para montar nunha gamela e navegar ate América...

Cantamos, aturuxamos e nadamos (aínda que non o creades)...

Faláronnos das cousas que o mar leva e o mar deixa, fixemos un percorrido polos faros pero, sobre todo, contaron historias das mulleres do mar ou do mar de mulleres.

Novembro, mes da ciencia en galego nas bibliotecas

 

No mes de novembro, celebramos o mes da ciencia en galego. A Consellería de Cultura, Educación, Formación profesional e Universidade, en colaboración coa Secretaría Xeral de Política Lingüística, vén impulsando esta celebración nas propias bibliotecas desde hai xa uns anos con diversas actividades. Este curso o manifesto co que dar visibilidade a esta conmemoración está escrito por José Manuel Castro Tubío, profesor, investigador principal e divulgador na USC, con investigacións relacionadas co cancro.

Na biblioteca atoparás unha exposición de obras relacionadas coa ciencia, desde libros nos que aprender a facer experimentos,  biografías de científicas, libros sobre física, química...; ata obras narrativas que tratan este tema.

Celebramos o Samaín

E por fin chegou o día de celebrar o Samaín, así que decoramos o centro para a ocasión. Moitas grazas pola vosa participación, familias, profesorado e  alumnado. Así da gusto!

Estas foron algunhas das actividades que levamos a cabo:

• Decoración de portas en EI e EP.

• Mural no corredor de EI e EP.

• Exposición de lecturas terroríficas e decoración da biblioteca.

• Exposición de cabazas nos corredores.

• Exposición na entrada do centro dos debuxos terroríficos que fixo o alumnado da ESO nas titorías.

• O Departamento de Inglés elaborou, xunto co alumnado, unha listaxe de libros de terror. 

Taller de xogos de mesa

 

Esta semana tivemos a sorte de contar cun taller de xogos de mesa para todos os niveis. Kiko e Cris, de Chafarís,  foron os encargados de mostrarnos unha morea de xogos cos que non só nos entretivemos, senón cos que tamén aprendimos algunha cousiña.

Gustáronche os xogos? Quererías ter algún na ludoteca? Podes deixar un comentario ou falar co Equipo da Bilblioteca.

A continuación tes todas as imaxes: